今年初先至上市嘅福建諾奇（1353）爆出老闆丁輝私吞巨款走佬，仲停緊牌，同樣喺福建有生意、又係做男裝生意嘅卡賓（2030）噚日召開業績記者會，主席楊紫明難免被人問到點睇諾奇事件。點知佢話去咗美國成個月，都係返嚟從傳媒先知道呢件事。
一問到佢私底下識唔識丁輝，話晒既係同行，又喺福建做生意，公關就好緊張咁叫大家最好只問有關公司嘅問題，不過楊紫明都有答，話「我是知道有這個人，但我們不是朋友」。再追問有冇投資者因此對卡賓信心動搖，佢就笑笑口咁話：「不如你關心我在美國玩得開不開心吧。」
咁又係呀，舊年10月上市嘅卡賓剛公佈派中期息8仙，楊紫明持有公司74%，可以袋4,200萬元股息，何止去美國，再去歐洲玩多個月都得，最開心係佢喇。