早排講今年世界立立亂，墜機打仗消息不絕如縷，話口未完又輪到瘟疫危機，仲要係揩親九死一生嘅伊波拉病毒，聽專家講今次爆發程度前所未見，雖然疫情未見擴散，但如果一個唔好彩殺到埋身，人心惶惶下，講唔定會成為衝擊金融市場嘅黑天鵝。
憑藉聯儲局量寬呢支大補針催谷，環球資產近年漲個不亦樂乎，縱使歐美股市近日回調，亦都只係大漲小回。話雖如此，近日陸續有大孖沙唱淡。聯儲局前主席格林斯潘日前就預警美股將會大冧，但格老都好謹慎，唔敢估幾時開始跌。而債王格羅斯則認為多年低息後，各類資產價格都扯得幾盡，加上海嘯後環球經濟增長難復舊觀，估計息口趨升下，資產價格唔跌都偷笑。
值得注意的是，正當歐美股市近日腳軟之際，中港股市卻生猛非常，呢個究竟係巧合定係環金資金流向轉變所致，暫時未有定論。不過，今年表現麻麻嘅美元，近日卻升下又多啲，升下又多啲，有啲強勢若隱若現feel，應該跟儲局買債行動10月散band有關。
聯儲局周三議息後，每月再減少放水100億美元，係連續六次收細水喉，會後聲明重申結束買債後應該維持低息一段時間，經濟及失業率有改善，但多個指標顯示就業市場資源過剩情況仍嚴重。聲明較大的改動是對通脹的描述，指通脹越來越接近局方長期目標，並認為持續低於目標的風險已有所下降。
經濟未脫困 加元沽壓重
值得注意嘅係，雖然以耶倫為首的鴿派在儲局內佔主導地位，但鷹派的費城聯儲銀行行長普洛瑟以擔心儲局續撐低息政策嘅立場落後於形勢為由投反對票，係耶倫2月上任後四次議息會以來首次有委員say no，適逢隔晚美國公佈第二季GDP增長達4%，遠超預期之餘，佔經濟最大比重嘅消費環節表現理想，家庭開支增幅達2.5%。《金融時報》評論認為，係經濟和通脹升溫格局下，普洛瑟等鷹派必定施壓，令兩派角力升溫。
隨着儲局放風10月結束買債，加上最新通脹指數升至2.3%的三年高位，美元兌各主要貨幣明顯轉強，幾隻主要貨幣都失守支持位，如歐元昨就跌至1.3372美元，創八個月多新低，英鎊跌穿1.7算，昨曾低見1.6861美元；連今年強勢嘅紐元則續受到奶品跌價同央行唱淡打擊，回落至84美仙水平，市場擔心該國經濟前景，拖累加元本周跌約1%，美元兌加元昨高見1.093。受到美國通脹和經濟加快復蘇刺激，美國10年期國債孳息上返2.5厘，加埋日本零售以至工業生產數據都欠佳，令日圓重現跌勢，美元昨已升至103日圓，創個半月新高，估計短期升勢未盡。
奇兵
本欄逢周五刊登