「早兩日去海洋公園，服務態度差到冇朋友，同奇妙世界的迪士尼相比，真係天與地！去餐廳叫加水聽唔到，落單時表明有coupon埋單時又埋怨你唔早講。排隊玩遊戲普遍態度差到不得了，直情係黑面粗聲粗氣。問路係我講唔該、請問點行，面對面望都唔望你，冇伸手指示冇尾音：『右邊』我：『你右邊定我的右邊？』職員：『我』 。玩沖天滑浪坐對面的是內地客，收遮收得慢，個職員黑面搶人把遮！
嚇親企鵝、嘈醒熊貓的，都係操國語的遊客，確係好乞人憎！唔知係咪因為咁，海洋公園的staff都做到好躁底呢？不過就有失專業囉！做主題公園係要帶畀人歡樂，唔係畀氣人受！做得辛苦你可以唔做，嫌錢少可以另謀高就，份工好晒都一早知㗎啦？做得呢份工，就預咗內地遊客多/乞人憎，你有權討厭，不過收工之後囉！只要投入啲肯笑吓，遊客唔理你內心諗乜，只會覺得你服務幾好。
將心比己，換轉呢班後生仔出到旺角買手機，個sales望都唔望你，你想試機嫌你煩，畀錢畀得慢黑你面，唔會反感不會投訴？高層冇咗橋王盛智文，配如此「高質」服務，真叫人為樂園擔心……Son姐作為專家的你，有機會就鬧醒呢啲後生仔，珍惜機會捱吓世界，不過我深信佢哋聽得入耳的機會，等同叫內地客學識保持安靜一樣，難過登天！」
這位熊貓朋友，物傷其類勞氣疾呼，愛之深責之切，我明！我是Son姐不是神，哪來神力挽狂瀾？自由行開放之後香港服務業水平一直下降，呼喝斥罵都敢，反正老襯冤大頭死極都有，使驚冇生意？
慎終追遠，一切皆因不把工作當成一回事，不尊重更不稀罕所致。欲罷不能，再斬四両，請繼續追看！
張慧敏
http://www.facebook.com/HKcareerdoctor