證券業界一向認為耀才證券（1428）企喺港交所（388）、證監會嗰邊，對方有乜新措施，佢通常都會高調支持，估唔到被證監會譴責兼罰款，耀才都出感謝啟事，感謝證監會指正。
證監前日指，耀才喺舊年8月至9月期間喺四份報章同耀才網站刊登廣告製造假象，令人誤以為耀才嘅黃金業務受到規管。而事實上，黃金業務唔屬於《證券及期貨條例》下嘅受規管活動。證監因此向耀才罰款70萬元。
業內人士被證監會譴責同罰款，多數唔出聲或喊冤兩句，好少好似耀才咁，直情出感謝啟事多謝證監會指正，佢仲要講多句，話希望政府考慮盡快將金業納入受監管之列，保障市民云云，實在相當出位。