靠中共登上特首寶座嘅狼英，其實都算有少少自知之明；事關除咗中央祝福，只以689票當選嘅佢，仲有乜把炮吖，又難怪佢要盡一切機會討好領導人嘅！採訪多年內地新聞嘅資深傳媒人呂秉權，噚日就喺《壹錘定音》節目話，官場流言每次狼英上京同領導人會面，都會喺事前率先打探京官當日打乜顏色嘅呔，然後佢都打番襯晒色嘅呔，頗得京官歡心㗎！
符合內地穿衣潛規則
呂秉權話呀，內地官場嘅穿衣潛規則，係穿衣盡量同人一致，唔好同人唱對台，例如人家打藍色呔，你就打藍色呔，所以佢聽聞狼英會透過領導人嘅工作人員，了解領導人打乜顏色呔。有圖有真相！八方發現，狼英喺2012年3月25日當選後，每次北上見領導，無論係攞委任狀、述職或參加活動，由前朝胡錦濤溫家寶，到𠵱家嘅習近平同李克強，佢打嘅呔幾乎次次都同領導人襯晒色tone，頂多只係深淺度唔同！
呂秉權話領導人喺呢方面「幾冧」㗎，因為可以由顏色睇到下屬識做。例如領導人去災區，會着白恤衫摺起兩袖，其他隨行人員都會有樣學樣，但衣着規格絕對唔會over過領導人，佢話內地官場呢種模仿高官嘅衣着係相當普遍。
至於前任特首曾蔭權打煲呔上京，會唔會令人側目？呂秉權話，中央個別官員的確對曾蔭權打煲呔感到突兀，但係識耐咗，知道打煲呔係佢習慣後，就覺得冇乜嘢！
李八方
mailto:[email protected]