恒地（012）樓神林達民（Lam哥）唔知係咪受到身邊嘅鄺美雲影響，賣樓都賣到好似藝人咁，呢排次次出場都形象百變。
早排展示馬鞍山迎海會所，就「賤輝」上身扮拳手踢沙包，噚日介紹元朗尚悅會所就化身李雲迪，坐喺鋼琴前面扮彈琴畀大家影相交差。
鋼琴價值逾百萬
Lam哥話，相中呢座鋼琴係由歐洲名師Robert Majkut設計，價值超過100萬元，個琴仲識得自動演奏㗎！唔要佢自動波嘅話，屋苑住客可以租用呢個場地同鋼琴，搞番個私人音樂會。
好可惜，Lam哥噚日未有熱烈地彈琴，獻奏一曲鄺美雲嘅《再坐一會》，不過咁，由於嗰度地方淺窄，幾十名傳媒爭位影相，影完一輪，佢以為影完，起身之際，原來仲有攝影師未影，結果歌就冇唱，但就真係搞到再坐一會。