主責政改嘅政務司司長林鄭月娥前日同佔中三子首次碰頭，但林鄭只係一味叫三子放棄佔中；至於全民投票結果，似乎聽唔入耳。民主黨噚日推出惡搞短片諷刺一番。故事講述「政改假諮詢三人組」對「和平佔中三子」嘅冰壺比賽，先由奶媽林鄭「落重篩」推出假普選方案，「隊友」譚志源同袁國強用力「刷吓刷吓」，確保篩走其他普選方案。結果係點？當然係三子個冰壺成功「佔中」，反敗為勝啦！
負責製作短片嘅白鴿黨創意媒體部部長黎敬瑋話，短片其實整咗幾個月，林鄭見完三子之後覺得係推出嘅時機；至於片中鬼馬旁白，就由佢本人同南區乳鴿仔區諾軒負責配音。想同八方一樣笑吓嘅可以上白鴿黨facebook睇片。