嗰個張融，呀，好似係周融搞咗個反佔中簽名運動，話咁快簽名人數就破百萬大關，遲早會打破世界紀錄。係㗎，可能今時今日嘅香港社會仲未夠反智啦，呀鄭融，sorry，應該係周融，七月鬼節流流，仲發動市民為「和平」獻上紙紮木棉花，八方放長雙眼，等住睇佢點樣締造歷史呀。個反佔中簽名運動搞到咁空前成功，有藝術家同市民就忍唔住曲線支持吓佢哋，藝術家Clara Cheung噚日就深入敵陣，去到銅鑼灣反佔中簽名攤位，舉牌支持佢哋。有乜支持理據？好簡單啫，兩張大紙牌：「我反佔中，因為唔駛用腦諗」、「我反佔中，因為佔中無錢派」（圖），經已說明晒一切，八方不再解釋。
互聯網