【本報訊】立法會財務委員會昨天舉行年結記者會，在處理東北前期撥款時方寸大亂兼粗暴表決的主席吳亮星，自評表現合格並有60至80分，強調從事公職就「食得鹹魚抵得渴」，自我感覺良好的他卻不滿泛民向他提出不信任動議，嘲諷泛民此舉如「小朋友」和「無事生非」，辣㷫身旁的財委會副主席劉慧卿即場反擊：「有時面就人哋畀，架就自己丟」，兩人在記者會上針鋒相對。
記者：呂浩然 林俊謙
吳亮星昨總結過去一年財委會工作時坦言，自己不是新任議員，但「遇到呢啲（具爭議）項目同埋喺財委會嘅處理，我係新人」，不諱言有改善空間。雖然引起議會內外史無前例的爭議和衝擊，吳被要求自我評分時竟稱「合格，但不能講得係高分。幾多分呢？60至80分之間」，又稱「參加咗公共服務嘅人好難講後悔，因為人哋話齋『食得鹹魚抵得渴』，你既然嚟服務，你就唔應該埋怨」。
稱非有心避傳媒
對於泛民曾經向他提出不信任動議、並以利益衝突問題質疑他不應主持會議，吳反駁：「如果我要主持一個會議，而事實上係唔明顯地邊樣嘢係犯咗乜嘢規定嘅話，我冇可能隨便就話唔做（主席）或者等等，因為咁樣相反俾人睇起上嚟好似好小朋友」，責難泛民向他提不信任動議是「無事生非」。
與他一同出席記者會的劉慧卿聞言後反駁：「無事生非呢，呢個係主席嘅睇法……但係當日發言支持不信任動議嘅議員，佢哋係講出咗好多理據，可能主席就認為唔成立」，更即時「教精」吳亮星指：「面就人哋畀、架就係自己丟」，認為指吳亮星不應與議員「駁嘴」或推測議員的發言動機。
吳不甘示弱，立即「駁嘴」指社會多元化，「有人畀面、有人丟架呢個好正常」，強調處事憑良心，而且有堅持、有承擔及不偏不倚，並解釋當日財會通過東北撥款後，他在保安簇擁下登車離開，純粹是聽從秘書處指示，並非有心避過傳媒追訪，「我做主席睇唔到（追訪）、唔係孫悟空嚟㗎嘛，隔遠都睇到嘢嘛」。劉隨即「勸言」：「好多時越困難，就可以畀機會你顯露你嘅才華囉」。
懶風趣求「買票」
按泛民與建制派的協議，最後一個立法年度會由吳當財會主席，他指現時是否續任仍言之尚早，並向劉慧卿「抽水」稱，若劉角逐財委會主席，「睇吓佢到（劉）時買唔到買我條票，𠵱家講錢㗎嘛，150萬、200萬嗰啲」。劉立即嚴正要求吳澄清，吳笑稱只是說笑。