一聽到去高原比賽,球員一定耍手擰頭,上到海拔2、3,000米,唔好話叫佢哋跑,連呼吸都辛苦啦!家陣好多關於點樣可以克服呢種高原恐懼症嘅研究,好似阿根廷球會聖羅倫素咁,佢哋今朝喺自由盃4強次回合,作客海拔3,650米嘅玻利維亞球隊玻利瓦爾主場,話就話首回合贏緊5球,不過賽前都要食「偉哥」抗高原!我求大俠睇過啲醫學網站,提到偉哥可以克服高原效應,就驚班球員興致勃勃過頭,唔知有咩副作用咋。
軍醫:有效但好危險
大家都知,俗稱偉哥嘅威而鋼,係為啲不舉或者想壯陽嘅男士而設,主要係用藥力刺激男性陰莖勃起,等佢哋可以同伴侶享受開心嘅夜晚。正正係因為偉哥可以令人嘅血管擴張,亦可以提升肺活量,咁啱球員喺高原比賽嘅最大問題就係缺氧,加上偉哥唔係禁藥,所以南美嗰邊啲運動員都周不時因為喺高原作賽而服用。今次聖羅倫素全體球員服食,引起成個足球界關注,但我求大俠最好奇係啲藥力可以維持幾耐,如果球員踢完波、沖完涼仲咁「硬淨」,會唔會有下場呢?
天使鬥「玻」急call氧氣罩
前港足軍醫郭志堅就話,偉哥嘅昔多芬成份喺醫學上確係有預防高山症嘅功效,但同時都會增加心臟負荷,有一定危險性,唔可以亂用:「球員比賽嘅時候運動強度高,若服用『偉哥』,會更容易誘發心臟問題。我哋一向唔建議運動員喺訓練或者賽前食藥,何況係本身有危險性嘅藥物。」
聖羅倫素班兵咁有備而來,唔知係咪同佢哋嘅國家隊過去幾次「葬身」高原有關。最經典嗰次就係5年前嘅世盃南美洲區外圍賽,當時仲係由球王馬勒當拿帶隊,去到玻利維亞突然好似唔識踢波咁,反應慢幾拍,結果俾班地頭蟲大炒6:1,遭遇球隊本世紀以來嘅最大恥辱;而喺舊年3月嘅2014世盃外圍賽,「藍白兵團」再次嚟到拉巴斯高原,都係贏唔到之餘,翼鋒迪馬利亞仲要兩度用氧氣罩嚟呼吸,可想而知幾咁辛苦!唔知佢哋下次再去高原比賽,會唔會啪番兩粒偉哥先呢?