美國Tesla電動跑車上星期終於有第一批右軚版Model S抵港，令Tesla成為本港車界熱話，其實Tesla嗰位43歲嘅舵手馬斯克（Elon Musk）本身都係話題人物，佢被喻為現實版「鐵甲奇俠（Iron man）」，就連美國長壽卡通《The Simpsons》都要搵佢現身客串一集。
馬斯克係科技富豪，成名作係網上支付系統Paypal，而Tesla就更多人談論。據講，馬斯克稍後將於《The Simpsons》其中一集亮相，故事係講劇中飾演核電廠老闆嘅Mr. Burns打算殺死馬斯克，兩人將有一番惡鬥。馬斯克亦曾於《鐵甲奇俠》第二集飾演番自己，不過只係大茄。
《The Simpsons》呢套卡通已做咗25年，不時鍾意搵財經名人客串，之前曾經將facebook創辦人朱克伯格同埋亞馬遜創辦人貝索斯畫成公仔飾演一角㗎。