「有BB 係女人嘅福份。」
2010年，林嘉欣在演藝星途中突然消失了，嫁給導演袁劍偉，留加拿大生大女Kayla和剛滿一歲的細女。事隔4年，做了媽媽的林嘉欣又回港了。忍痛餵人奶、日日換尿片的日子，為她見證了時間、豐富了人生。嘉欣媽媽如同初出道一樣，非常清新、甜美又實在，未來去哪兒，都充滿快樂和愛！
撰文：林妙萍
攝影：郭賢興
造型：顏英儀
髮型：Him Wan
化妝：Shuen Kong
「唔好幫我執得咁瘦，費事脫離現實啦！」林嘉欣離開studio時，笑住叮囑。從來女星們只會叫攝影師幫忙「去眼袋」、「減腰圍」，絕少聽到要求保持真實性，肥也沒問題，正如她所推介的童書一樣，It's okay to be different。
餵人奶 驚到喊
35歲的林嘉欣非常真性情，今年簽了新經理人公司復出，配音、拍片，由全職媽媽，變回working mother，「我一直冇話過息影呀，只係拎咗幾年時間，停一停，放慢腳步，去生女囉！過吓家庭生活，湊吓女，換吓尿片，餵吓人奶。」
坦言只是順住路行，4年來做媽媽有無數疑問，更喊過不少次，「好普遍係餵人奶，第一胎餵人奶時，點解咁痛呀？點解（乳頭）會損晒？我媽餵大咗4個，冇可能咁痛，簡直係，BB未抱埋嚟，我已經大叫，『呀～咋～呀，嚟喇！嚟喇！』係咁驚，係痛到咁嘅程度。」母女之間，就由這種痛開始，一齊學習人生。
加拿大育兒方法傾向自由自在，林嘉欣想女兒中文基礎好，決定讓女兒回港讀書，但成長環境就由自己營造，「我自己都好任性，啲人唔知，因為我個樣好nice、好sweet，由細到大，我唔鍾意聽指示做嘢，我都希望兩個女有獨立思考，畀佢哋自由放任、探索世界。」
母與女 慢活吧
有了女兒，嘉欣坦言對生死的感覺更強烈，時分秒也有了新體會，以往開工收工日過日，偶有工作感動位，但普遍時間迷茫，「成日問『我做咩呢？我𠵱家做緊乜呢？』做完都冇大感覺，但當你一手一腳湊細路，響佢哋身上，係睇到時間嘅見證，我係好實在地過咗4年，絕對對演戲，或作為一個人，好唔同！」
現在3/4時間湊女，1/4工作，每一日慢活，只想女兒多探索世界，堅拒做怪獸家長，「每朝6點半起身，攬一攬兩個女，傾偈，食早餐，送返學，放學就free play ，一齊聽下音樂、閱讀下，無特定嘅時間表，總之好他條，我哋一日係過得好慢。」
出童書 導演夢
林嘉欣湊女期間，在網上開blog 介紹童話書，積累不少讀者，她計劃下年書展也出一本自己的童話書。電影工作，年底拍攝新電影，之前做了兩個影展評判，看了亞洲新導演，開始思考香港電影的形象與認同感，更想開拓演員以外的電影世界，「我唔敢講我想做導演，但想嘗試幕後工作，唔知有冇人願畀我呢個機會？」
3本必讀兒童書
湊女期間，林嘉欣愛上研究童話書，更在網上開blog分享，以下3本是她推介：
「本書係講好多我哋以為係垃圾、錯誤，原來可以係好美麗。好似一撻咖啡迹，你拎開，Oops，原來係一隻好靚嘅雀仔；一堆廢紙，堆埋係變咗一朵花咁。從錯誤中，學習認識事物嘅美好。」
「我哋可以有多一個爸爸媽媽、可以冇頭髮、可以同狗狗一齊沖涼，都OK！好多時，我哋點解會有歧視，就係因為不了解，所以恐懼，本書係話畀大家聽，與別不同都OK，亦因此地球先美麗。」
「每次睇，我都忍唔住想喊，本書每次開頭就用someday（有一日），講述一個BB出世，由嬰兒、小朋友、到成為大人，到最後媽媽離開嘅故事，很感人。」
更多精采時尚內容，盡在 http://add.appledaily.com。