Pop-up店舖同餐廳喺香港越嚟越流行，好似早排LINE公仔就喺銅鑼灣希慎廣場開pop-up店，餐廳方面，中環置地文華酒店繼早前搵墨西哥同西班牙名廚來港開pop-up餐廳後，將會喺9月搵來泰國曼谷Gaggan嘅印籍大廚Gaggan Anand來港開3日pop-up餐廳，晚餐每位2,288元。
話明pop-up，即係相當短期，多數係商場、酒店搵來名人、名店搞花臣，吸客之作。
呢位Gaggan就專門研究分子料理，佢今年36歲，22歲時曾經接待美國前總統克林頓，又做過印度總統廚師，2010年喺泰國開Gaggan，英國權威飲食雜誌《餐廳》今年公佈全球50最佳餐廳，Gaggan排第17位，置地文華裏面嘅法國餐廳Amber就排第24位。