美魔女羅霖、陸詩韻同陳爽噚日喺圓方出席la prairie新店活動，羅霖繼日前喺佢有份投資嘅美容店開幕活動中，含淚爆曾遭家暴，反被前夫劉坤銘指佢博宣傳，羅霖有晒準備還擊：「其實我覺得呢件事好難堪、好難過同羞家，點會拎嚟宣傳，男人基本條件要有承擔，呢件事係一個事實，好多人都知道，隔咗咁耐先講出嚟，唔希望某啲人用唔真實嘅事去誤導小朋友。」
「屈埋會唔開心」
羅霖更指開店前幾日有親人過世：「會更加愛惜身邊人，大家開開心心，唔好勾心鬥角，同埋自己一個人屈埋會唔開心。」羅霖繼續爆料，話公開咗家暴事件後，收到恐嚇訊息，佢話：「我噚日收到一個恐嚇訊息，唔可以講係邊個，費事收到律師信，唔係語言上，係睇完唔安樂，呢兩年幾時不時都收到呢啲訊息。」羅霖結束訪問再行返轉頭同記者補充：「我唔係主動攻擊人，我係守嗰個，人容忍有限度，如果佢唔係同小朋友講，都唔會講出嚟。」
撰文：馮仁昭
