永亨（302）的全購交易，日前大團圓收尾。買家新加坡華僑銀行最後取得97.52%永亨股東接納要約，成功私有化。對沖基金Elliott Capital要求加價失敗，終投降離場。
事件如此平淡落幕，有芬佬覺得意外，因Elliott向來以狠辣見稱，備有律師團隨時興訟，而且持貨能力極強，睇佢哋同阿根廷鬥足10幾年就知。Elliott今次咁「順攤」走人，有口痕友認為這反映兩個事實。
首先，永亨本身可「再發揮」的空間唔多。同Elliott以前搞過的盈大（432）唔同，盈大股價長期大幅折讓NAV，有好多方案（如賣產、重組）可提升股東回報。但永亨平均ROE只得低雙位數，如無併購概念，畀到盡合理PB只是1倍多啲。加上華僑已取得超過50%的永亨控股權，基本上唔會再有第三方咁傻出手爭購。故Elliott是睇準有水位可迫加價，但如果最後真的唔要offer，繼續坐下去，再捽的空間亦有限。
另一個Elliott可能overlook咗的原因，是亞洲地區的投資文化和歐美有別。亞洲大量上市公司，長久以來都是由大孖沙壟斷控制權，導致投資界傾向和公司建立良好、可持續的關係，唔興做activist。
Elliott今次出頭，最後竟然搵唔到其他基金股東，願意和他站在同一陣線，這可能才是Elliott今次出手，最失算的地方。
海迪