今個星期的成交量大幅增加，每日有成700至800多億元，另外，恒生指數同時亦都破咗52周嘅高位，互聯互通嘅消息日趨越嚟越熱，成交方面，又再開始配合。
唔信邪都要跟勢走一轉，殼股炒完，又炒中資股，又炒低估值嘅股，真係熱鬧同精采。
可以肯定的，要喺咁多隻股當中，揀一隻既有亮點、而且又被低估嘅股票真係非常之咁難，不過Prof J今次又用蜻蜓投資法捉到一隻好股，佢就叫做華耐控股（1020）。
拓展海外高檔市場
話晒華耐控股（1020）係從事毛利率有成七成嘅高端鋼水控流產品製造，主要客戶係內地上市龍頭鋼企，而華耐亦係行內嘅大佬，十大鋼鐵企業中，有七間都係華耐客戶，當中有大家熟悉嘅馬鋼（323）、首鋼、寶鋼及武鋼等等，市場佔有率極高。
為咗開拓內地、亞洲、歐洲等高端市場業務，華耐希望未來嘅半年能夠完成擴產，內地產能便有望增加成倍至16,800噸，再加上近排，華耐同中鋼集團簽咗協議，同時，亦增加台灣及韓國市場銷售量。
華耐亦同咗德國Carboref GmbH簽訂諒解備忘錄，希望於中長期的時間能增加歐洲銷售產品，提升華耐喺海外嘅收入比重。
華耐近排亦有新搞作，佢好大機會收購重慶安軒，安軒係重慶市國有企業，主要從事道路護欄供應及安裝服務，安全產業係中國新城鎮化地方政府極為重視嘅產業，如果收購落實的話，業務會取得重大突破發展。
按照呢個發展方向，華耐喺內地、亞洲、歐洲的發展更加日漸成熟，令收入面更加廣闊，收入更加顯著，再加上收購有突破性的發展，喺成交配合之下，有望升至52周的高位0.88元，大家可以繼續追蹤，出發！
徐燦傑
齊魯國際控股首席策略總監
本欄逢周四刊出