80年代曾喺TVB做新聞主播，又喺港台擔任電視節目主持嘅公民黨毛孟靜，噚日成為受訪者時突然「中伏」，笑死唔少傳媒行家！
話說Miss Mo噚日喺立法會咪兜前想解釋收錢風波，唔知道有線電視直播緊，埋位後即捽鼻，再同記者講：「等我一陣，等我整一整個鼻先，塞晒，我怕講唔到嘢。」搞到有線電視即時中斷直播，再由面露尷尬嘅廠景女主播講咗句「現場情況暫時睇到呢一度」嚟打圓場。
Miss Mo知情後解釋，由於受訪時鼻太塞，怕訪問過程講嘢唔清楚先突然閃開整鼻。佢話當年做記者時完全無現場直播呢家嘢，唔知受訪片段出緊街，日後會加倍小心免中伏。佢之後仲補拍捽鼻相放上facebook自嘲一番。