政圈盛傳京官下月再度南下同全體立法會議員傾政改，但級別唔會再係全國人大委員長張德江咁高嘞！查實上次張德江南下，安排見人嘅行程都好緊密，日日車輪轉同唔同黨派及組織傾，唔知佢記得幾多張建制派面孔呢？但相信對有政壇方中信之稱嘅自由黨鍾國斌Felix（圖）就印象深刻嘞。
八方聽聞，張德江第二日見政團時，自由黨係嗰日最早嗰檔，除咗田少、莎姐、劉健儀同方剛，議會新丁鍾國斌都有出席。據聞田少佢哋席間講到自由黨發展，自嘲佢哋幾位元老都係60幾歲咯，得Felix係5字頭。
點知張德江聽完即刻搭嘴，話會前睇過會面人資料，好記得鍾國斌係六幾年出世，當場問Felix到底係六幾年？被委員長點燈嘅Felix即刻好似學生哥咁，舉手回應63年出世。