全國人大委員長張德江見完班保皇黨後，保皇黨爭先恐後反佔中，但個個都搞簽名，點先能夠喺芸芸反佔中人海中，突圍而出被阿爺睇中呢？位處中聯辦選區嘅中西區區議員陳財喜就醒目嘞，佢噚日宣佈成立10人律師團隊，因應佔中行動衍生嘅問題，提供法律意見同免費諮詢服務。乜嘢法律意見咁巴閉？佢話喎，好似有商戶曾經不滿有人喺中聯辦門外示威阻住做生意，自己隨即向對方提供「專業意見」，就係叫對方「報警」，請警方搵人幫手開路。
陳財喜仲話呀，孕婦若因佔中堵路中途難產，都可以問吓佢哋點樣民事索償，但話明呢個係極端例子，並強調律師團隊提供嘅法律意見只係幫手研究，例如係咪申請禁制令等，講明唔會幫中小企進行法律訴訟，最後中小企採取任何行動，都要自己真金白銀請律師。