學民思潮召集人黃之鋒同發言人周庭係唔少年輕人嘅偶像，但原來佢哋冇政治偶像。話說佢兩個噚日一齊出席商台節目《在晴朗的一天出發》，周庭席間講到，不時被傳媒問有冇政治偶像，強調對佢哋呢班90後嚟講，已經冇政治偶像呢樣嘢！點解呢？佢話80、90年代中，可能仲有李柱銘、陳方安生等德高望重人士，為香港爭取民主，𠵱家政界已經冇特別德高望重同特別值得尊敬嘅人物，所以就算有尊敬，都唔會將佢哋當偶像，唔會追隨佢哋所走嘅路。
其實佢講到陳太時，在旁嘅之鋒一度厚多士搭嘴話：「陳方安生90年代都唔係爭取民主喎……」搞到戰友周庭好尷尬咁笑，最終由主持人打圓場，話陳太係2000年代嘅人物，此時之鋒又搭嘴形容陳太係「神枱級人物」㖭！