舊年初君臨天下一宗雙屍案令賭王四太梁安琪名下一個九龍站君臨天下3座嘅複式單位頓變凶宅，四太之後喺單位做咗場法事，再重新裝修，聽聞呢個單位已經租出，月租超過十萬元，新租客係外國人，因此百無禁忌。
銀主盤低市價一成賣
呢宗雙屍案舊年相當轟動，男事主係號稱「水果大王」嘅馬主彭熾輝，被第二任妻子斬死，女事主黃淑勤再跳樓自殺。原來佢哋生前有投資物業，其中一個投資物業亦係喺君臨天下，係1座中層F室一個內園景單位，單位由案中女事主黃淑勤持有，噚日被賣出。
呢個君臨天下單位早前淪為銀主盤，上月曾經喺拍賣行進行拍賣，當時開價2,328萬元，可能太過進取，冇乜人承價，亦未達到銀主心目中成績，最後收回。
銀主其後減價，將底價降低166萬元，至2,162萬起拍，噚日再拎出來拍賣，結果獲買家以2,230萬投得，以實用面積1,062呎計，實呎僅2萬元，相比銀行估價2,500萬，低咗大概一成。
呢個單位係黃淑勤喺2009年金融海嘯爆發後，用2,027萬買入，其後做過兩次按揭，今次售價，只較五年前高出大約一成。
咁究竟買入兇案事主持有嘅物業會唔會唔多吉利呢？風水師麥玲玲就話，風水學上，事主冇住過嘅物業，冇影響到物業嘅磁場，理論上就冇話吉唔吉利，冇乜所謂，主要視乎買家點諗㗎啫。
李華華
mailto:[email protected]