佔領中環何時是時機？工黨主席李卓人從工運看佔中：「佔中好似工人爭取加人工，冇理由等對方話加幾多，我哋先罷工，要顯示實力，增加談判籌碼。」若等到冇真普選先佔中，「可能只係洩憤，表示憤怒」。
他分析，佔中目的是逼中央、港府交出真普選方案，若待政府方案提出，發現不符合國際標準，屆時要推倒重來十分困難，佔中可能只是發洩不滿，「我諗去到某個位，要行動畀人睇到你實力才有談判籌碼」。
他對普選感悲觀：「對住中共專制政權，要普選真係唔係話拎就拎，你要用最大民意衝擊佢。」他指早前絕食、毅行等運動，深入社區，凝聚民氣。因此全民投票、7.1、預演佔中要一氣呵成，「你如果要用晒遊行嘅力量，一定要去遮打道，你去特首辦佔唔到中，要一氣呵成，遊行演化成佔中」。
對於建制派一直「提醒」泛民若與中央硬碰硬，只會將政改拉倒。李反指：「你鵪鶉就畀你？澳門夠鵪鶉，唔見畀民主普選佢，成日話你硬佢（中央）仲硬，搞到關係緊張，但唔代表我哋唔硬就畀個好方案，完全係呃香港人，因為共產黨本質就唔相信自由、民主，唔信香港人。」