英超球會修咸頓嘅女班主嘉菲蓮娜鍾意錢多過搞波，搞到隊波喺今夏俾其他球隊係咁「拆骨」，先有領隊普捷天奴去咗熱刺，跟住列基林拔、拉爾拉拿同洛夫雲做晒紅軍，勞基梳爾去咗曼聯，連哥林張伯斯都轉會阿仙奴，係就係賺咗9,700萬鎊（約12.6億港元），不過冇咗5件主力，「聖人」點踢呀？
日前仲傳出普帥想打舊會主意，挖走埋前鋒積洛迪古斯同中場舒尼達連㖭，難怪新帥朗奴高文（下圖左）喺twitter度pose咗張空空如也嘅球場相出嚟，仲寫埋caption話：「準備好練波嘞！」（上圖），都咪話唔欷歔。雖然佢喺前球會飛燕諾簽咗射手加斯安奴柏利，又撬走咗另一荷甲球會川迪嘅中場杜辛泰迪治，仲想打阿仙奴兩名中後場球員基拿比同贊堅臣嘅主意，不過星散到咁，唔怪得佢哋喺新球季嘅降班賠率由15倍大幅起票到得番6.5倍啦！