【本報訊】近年轉型賣零食、化妝品的CEC國際（759）再開闢戰線，10月起進軍網購市場。主席林偉駿接受訪問時透露，已選定葵涌一間三層高分店作試點，兼任零售及物流中心，主打「食米油鹽」等必需品，售價最少比超市平兩成，「希望18區每區都開一間」。
記者：鄭柏齡 李進曦 石永樂
早前CEC國際旗下的「759阿信屋」，有意與香港電視（1137）合作，加入後者的購物頻道，但林偉駿昨日指「唔知嗰邊（港視）等到幾時」，遂決定率先自立門戶，「喺葵涌搵咗一個三層高嘅舖位，租金非常低，一站式做零售、物流中心，服務附近居民」。
首站葵涌 街坊生意
林偉駿指，葵涌新店下月起裝修，連同網站最快10月投入服務，「準備咗三架貨van，做附近屋邨街坊生意」；為控制成本，送貨範圍僅限於葵涌、葵興及葵芳，店員亦需兼任司機，「如果每區都送，起碼要幾百部車；我淨係輻射周邊地區，開10間店亦只需30部van仔」。
網購產品將主打食米、油、鹽等必需品，「好多業主包括領匯（823）唔俾我賣米，我做網購就係要打入呢個市場」，林偉駿解釋，公司從泰國直接入口10公斤香米，售賣約60元，比超級市場售價平逾兩成，「難聽啲講就係要頂爛市」，而其他網上商店的產品，定價亦會較門市平10%。
為降低舖租成本，林偉駿坦言提供送貨的分店比較「隔涉」，「希望全港18區每區開一間」，目前考慮在青衣、九龍灣、港島東及香港仔開店。香港電視發言人昨晚指，對此不作回應。
浸大財務及決策系副教授麥萃才認為，阿信屋投資網購有一定難度，「香港運輸、人工成本咁高，以前唔係無人試過；但如果淨係賣米，一張單最多賣兩包，可唔可以抵銷成本呢？」他補充，本港互聯網滲透率已足夠支撐網購生意，成功與否需視乎產品種類、價格等因素。
酒寮拓中低價酒
CEC國際在業績報告上指，正籌備「759酒寮」、「759雲吞麵」及「759茶餐廳」等，林偉駿指，後兩者純粹「頂咗朋友間舖頭，等班伙計繼續有工開，餐飲業絕對唔係發展大方向」。
至於「759酒寮」，集團計劃年內開設五至六間分店，售賣40至120元的中低價葡萄酒，毛利率與公司其他產品相若。
目前，阿信屋平均店舖面積約1,400呎，林偉駿指年底前分店數目將增至240間，其中包括七間「萬呎巨舖」，故取消2016年分店達300間的目標。
【顧客意見】
陸小姐：
「我會考慮網上購買，全部產品都會考慮。我平時在門市買開醬料、麵、酒等等，其實平唔平都無所謂，最緊要方便我，我揀方便，因為有小朋友。」
陳小姐：
「我有興趣嘅，但方便最重要，唔使等好耐，要睇下訂完要等幾多日先有。平過超市嘅話，我會考慮下買米、韓國品牌方便麵、飲品等等。」
