練馬師蔡約翰上季半放棄韋達，大幅減少支持，有人話係雙輸局面，搞到佢哋爭冠軍練馬師同冠軍騎師都分別失敗，呢對拍檔只剩番少數馬匹仍保持合作，「戰利品」係其中之一，呢匹明星馬可以話風頭十足，至今出賽七次得五冠兩亞，全入前兩名，有人話佢係另一匹「精彩日子」，有條件喺新季一級賽香港一哩錦標爭雄。
「戰利品」究竟點勁法？上季最後一戰，喺二班跑出1分20秒73，原來係上季1400米最快時間，而且當日仲比亞軍馬多負八磅，預期今季「戰利品」復出，一定熱到燙手，不過佢咪係可以順風順水再上一層樓，絕非全無隱憂。
點解咁講呢？「戰利品」無疑經常撳住收韁大勝，睇落好勁，但至今五捷所跑贏嘅亞軍馬，「開心樂韻」、「伽楠」、「好加加」、「萬馬奔騰」同「萬事勇」，最叻只係83分嘅「萬事勇」，而「開心樂韻」更只係58分四班馬，「戰利品」卻已加到100分，今季一出如跑二班賽要負重磅，如跑級際賽則對手大幅增強。好多時輸死人嘅並非唔識贏嘅衰馬，而係期望太高嘅明星馬，希望「戰利品」唔好係其中之一啦！