阿爺點名六大央企改革，相信遲早輪到重量級央企五礦集團。而五礦建設（230）作為五礦集團嘅房地產旗艦，大有注資concept，遲早大龍鳳。
五礦建設終極對口單位，係內地份量級五礦集團，世界500強當中位列192位，上年利潤高達80億元人仔。隨着六家央企開波改革，穆迪就估計，未來一、兩年內，會有更多企業納入為改革試點。
五礦集團重量級數，阿爺繼續國、央企改革，好大機會有佢份，五礦建設同姐妹系五礦資源（1208）得米。
PB0.43倍 平絕同業
五礦建設呢半年冇郁過，但姐妹系五礦資源，半年已經大升咗100%，五礦建設落後之餘，五礦資源咁升法，定係有嘢跟尾？
事實上，五礦集團掌舵周中樞，今年3月講到明，五礦建設有機會注資，涉及資產高達300億元。五礦建設現價1元，潛喺四年底，市值得34億元，而周掌舵所講注資規模，係五礦建設市值近10倍size，五礦建設殘到爆！
又乜都唔計，五礦建設現價PB得0.43倍，講過係，呢個PB水位，係央企相關內房中，最抵搞一隻。而阿爺繼上個月，取消內蒙古呼和浩特市限購令，呢兩日再取消埋石家莊同杭州局部地區限購令。相信唔使好耐，全國取消限購，內房活番，五礦建設過4,000萬平方呎土儲，潛在增值和味龍。
估吓呢批土儲每方呎增值或獲利100蚊咁大把，已經為集團帶嚟40億元增值，相當於每股1.1元，折讓再擴闊到71%，流晒口水。
當炒同氣連枝，買落後好，博中線注資又好，五礦建設升1倍到2蚊，PB得0.6倍咁大把。
錢雋
細價股專家
本欄逢周二、三、五刊出