前政務司司長唐英年位於九龍塘約道嘅大宅，去年進行工程復修僭建地牢；而喺復修工程完成後，大宅就重新裝修，據聞完工之後，唐唐先考慮係咪再遷入上址。
八方噚日晏晝3點零，發現唐太郭妤淺獨自返回約道大宅巡視工程進度。肩負重建唐宮任務嘅唐太，一身花裙、平底鞋，拎住小手袋同布袋進入施工地盤，全程冇戴頭盔嘅佢，親力親為四圍巡，又拎出一份疑似圖則嘅文件細閱。
佢喺兩名地盤監工陪同下，不時爬高又爬低，認真牙煙。其間佢彎腰進入另一幢大樓嘅底層，離開時，地盤監工怕佢撞親個頭，好細心用文件頂住個鐵架！最後唐太逗留咗約個半鐘後離開，但未有回應係咪所有僭建已復修完畢。
八方現場所見，唐宮大部份設施已拆除，相信僭建嘅地牢已填平。