阿里巴巴創辦人馬雲沉默一輪，噚日忍唔住又向員工發放一篇千幾字嘅內部信，主要抒發吓佢對近幾個月各方就阿里負面報道嘅心情同睇法，馬雲提到一早預咗阿里IPO期間會有好多惡意攻擊同中傷，但即使有準備都「一度有過憤怒，郁悶和難過」。所謂食得鹹魚抵得渴，佢喺信中提大家要有心理準備，叫大家當嗰啲存心製造嘅謠言同毫無根據嘅指摘係「人類的情緒排泄物」。
成篇文嘅重點應該只係喺最尾一句，佢話「我們這麼辛苦，可不是為了變成一群土豪」，何謂土豪？記得舊年iPhone5s推出時冇乜新突破，但金色版就勁受強國人歡迎，金色喺內地叫土豪金，土豪更加成為潮語，簡單而言，土豪相當於暴發戶。假如阿里年內順利上市，馬雲嘅身家必然上漲，肯定好快變成暴發戶，即係土豪喇，馬雲話唔係要變成土豪，又係乜呢？