現年61歲鍾鎮濤（阿B）下個月就同拍拖17年兼生咗兩個女嘅女友范姜素貞結婚，年底再喺香港補擺喜酒。距離大日子仲有兩個禮拜，阿B都未肯停落嚟，仲捉埋囡囡父女檔做嘢搵錢。早幾日阿B同兩個囡囡鍾幗、鍾懿去咗廣州長隆野生動物世界，幫內地一個親子節目《寶貝聽你的》拍外景。
同大象踢足球
家姐鍾懿同細妹鍾幗喺鏡頭面前一啲都唔怯場，但當佢哋見到大象時，竟然驚到唔敢行埋去，好彩有爸爸傍住，得到阿B壯膽嘅兩姊妹就膽粗粗，試吓用麵包餵大象，餵餵吓又發覺原來唔使驚㗎喎！仲同大象踢咗場足球賽，之後仲當咗隻大象係寵物咁嚟玩。
後來阿B又同囡囡餵奶畀小老虎飲，不過細妹鍾幗縮喺家姐後面，年紀細都係細膽啲。玩完動物，梗係唔少得親子環節啦，阿B彈住結他同囡囡唱歌，真係父慈女孝，夠晒溫馨。
撰文：馮仁昭