行行出狀元，做「二五仔」亦隨時發大達，美國早前就有位仁兄因為咁獲分逾億元獎金，好個中六合彩頭獎。話說美國證監會為咗更有效打擊商業罪案，2011年中搞咗個名為「深喉」嘅舉報行動，鼓勵線人提供企業罪證，若成功協助當局將壞人繩之於法，最多可瓜分30%罰金。
根據《華爾街日報》索到嘅料，至今有逾6,500個、來自68個國家嘅人舉報，或者因為冇工返兼冇顧慮，退休一族最熱心，有365人報料，其次就係投資者同工程師，報料者遍佈各行業，連夜店職員同牧師都有。
不過，唔知係咪好多人「冇料扮四條」，至今只係成功揭發咗五宗個案，總共涉及1.5億美元罰金，最大宗嘅個案係一宗涉及250個苦主（據稱大部份為強國人）嘅芝加哥商人訛騙案，而報料嗰位仁兄就因為咁，獲發1,400萬美元（1.09億港元）獎金嘞。