投行賓架有佳音！金融海嘯後，全球大型金融機構嘅薪酬機制都被贒到實，人工同福利易減難加，不過最近有消息話，摩根士丹利諗住將一班年資淺嘅賓架底薪增加25%，希望可以挽留人才。
據聞，大摩全球投資銀行同埋資本市場部門嘅副經理同副總裁都有人工加，後生嗰班員工更加係今次加人工嘅重點。
大摩希望加人工可以減低公司人才流失；但講明加人工，唔代表花紅會同步增加。
彭博資訊就話，𠵱家職銜係副經理嘅員工通常都係做咗一排，或者剛從商學院畢業嘅畢業生；副總裁嗰班就多數做咗一輪副經理後被提升嘅，即係未算老鬼。
其實呢輪唔少華爾街大行都不斷出招留人，避免人才跳槽去私募基金呢啲競爭對手，之前瑞信同美銀只係叫啲後生員工唔好OT，周末放多啲假去改善工作條件。大摩今次肯加人工，對打工仔嚟講，感覺更加實際！