雖然係喺西環發功支持下，做到立法會財委會主席箒，但吳亮星唔使喺立法會休會後，都要去西環面聖啩？原來吳亮星上禮拜五現身西環，唔係入中聯辦多謝支持，而係去日富里視察。
話說吳亮星、新民黨葉劉淑儀、白鴿黨單仲偕同工黨何秀蘭，早前喺立法會接到一個申訴個案，就係城規會批准喺日富里起酒店之後，所引致嘅行人安全同交通問題，而吳亮星當日啱啱係呢個申訴個案嘅當值議員，所以最終拍住幾位港島區嘅直選議員，去日富里實地視察情況，而據現場消息指，吳亮星沿途睇多過講。
葉劉視察後話，發現嗰度真係有人車爭路問題，行人若遇上貨車上落貨會險象環生，鄰近富基大廈街坊亦擔心該酒店或成為時鐘酒店，影響社區民風同治安。佢同單仲偕雙雙表明，會密切跟進事件，會代市民向當局反映意見。