大學新生放暑假，最開心可能係去O Camp，原來個個都係「大嘥鬼」！香港地球之友本月做咗個調查，喺網上訪問463名大學生，了解佢哋喺迎新營嘅浪費行為，逾9成人話喺迎新營見過「唔環保」嘅情況，65%受訪者話浪費好多水，因為通常用食水打水戰，又有過半人話迎新營浪費食物，因為要趕住做咁多個task，又dem beat、dem cheers ，邊夠時間食飯喎！
玩得green 有$3,000
唔少贈品都唔受歡迎，最終統統去晒堆填區，例如牙刷（54%）、洗頭水（50%）、止汗劑（42%）、樽裝水（35%）。有大學O Camp搞手話，女仔唔想收呢啲用喺塊面同皮膚嘅贈品，事關唔係隻隻牌子都啱用，爛面點算好？同埋啲過時零食好似榴槤糖咁，「港孩」唔會照食㗎！
查實同學仔為免變晒大嘥鬼，好肯為環保出分力，近8成人話願意攞自己食具去O Camp。而喺舊年開始，已經有O Camp開始環保玩法！港大學生組織「常綠林」有個傳統要跳營火舞，搞手就諗不如唔好燒咁多木頭，改用電筒同玻璃紙扮營火。理大新成立嘅學生組織「綠行社」，搞手索性帶同學去露營、食齋，環保之餘又慳成千蚊成本。
為鼓勵玩得green，地球之友話如果度到環保好橋，最叻嗰5隊可攞到3,000蚊做贊助，9月中截止報名。
李八方
mailto:[email protected]