被踢爆有居英權嘅周融噚日出席反佔中活動記招，有備而來嘅佢突然掹出一本特區護照，話自己「一生人之中只有一個國籍」，但喺記者追問下承認，97年前外遊一直填「英國籍」。佢仲聲言因為傳媒追問，近日先「發覺」自己仲有英國籍，既然97後已覺得自己係中國人，所以咪取消居英權囉，「因為你哋（傳媒）問、你哋捽吖嘛，咁橫掂我都唔要咯，我咪唔要囉！」
周融講講吓突然發爛渣，話傳媒追問佢居英權，其實好有「威嚇性」，呢個唔應該係新聞議題，叫記者「搵晒老闆、總編輯、採訪主任、編輯、記者，公開講晒佢哋乜嘢國籍先啦，咁先可以一視同仁」。
佢臨尾仲高舉特區護照豎拇指話：「（佢）比其他護照都更加好，請大家記得搵移民局同我攞番啲廣告費。」