唔通呢個就係傳說中嘅「巴黎鐵塔反轉再反轉」！？望真啲，唔係星爺嚟㗎喎，撐起女友嗰個係前西班牙同巴塞中堅佩奧爾！
36歲嘅佩奧爾今個夏天退役，好好享受人生，佢近日就帶埋女友雲妮莎去西班牙嘅伊維薩島度假。但佢兩個唔知係無聊得滯，定係練緊啲神秘武功，見佩奧爾淨係着住條短褲瞓喺地，舉起雙手，托起雲妮莎對腳；雲妮莎就着住套比基尼，攤開雙手保持平衡。佢兩個仲將張相放上instagram，加加埋埋有成6萬個like。
瑜伽導師讚有番咁上下
不過，如果佩奧爾係練緊「巴黎鐵塔反轉再反轉」嘅話，似乎佢仲有進步空間，話晒星爺22年前喺《家有囍事》示範過最強嘅版本，就係男方都要企起身先得！內地網民就話佢兩位除晒衫，肯定係練緊小龍女同楊過嘅《玉女心經》！
我求大俠就問過專家，Dickson Yoga瑜伽導師Faye Cheung話呢種「雙人瑜伽」要有一定瑜伽底子先做到，一般人至少要有半年至一年嘅瑜伽訓練先好去做；同埋最好有導師從旁指導，因為呢個動作要求兩個人都要有好好嘅平衡力。睇佩奧爾佢兩個嘅功架，Faye估佢哋一定有番咁上下瑜伽年資。
美斯逃稅案隨時踎6年
佩奧爾就爽，不過佢嘅前隊友、巴塞隆拿球星美斯同老竇單逃稅案仲未完，雖然控方話美斯應該唔知情想撤控，但法官話有充足證據顯示美斯知情下叫老竇喺外地建立空殼公司去避稅；美斯父子就否認做過任何違法嘅事，相信呢單官司仲有排審，如果罪名成立，最高刑罰係監禁6年。面對外界批評，美斯就喺instagram放咗張圖，仲寫住「獅子係唔會在乎綿羊嘅意見」，極有霸氣！至於巴塞近日就去咗英格蘭國家隊嘅訓練基地聖佐治公園進行季前集訓。