但凡新華社出稿發表有關香港嘅稿件，全港傳媒都會大為緊張，睇吓阿爺對香港有乜嘢最新立場。但其實新華社發稿都可以好兒戲！話說周日新華社報道政務司司長林鄭月娥話中央係真誠推動香港普選，但呢篇「所謂」報道，竟然將林鄭月娥嘅名錯寫成「林政月娥」，全文只有三段，但新華社將林鄭個名搞錯足足三次，連標題都錯。
如果話新華社嘅喉舌文章要經多重中央部門審核先可以出街，呢幾重考核都幾求其，定係搞得政改，連個姓都要改埋先至夠忠誠？八方懷疑錯嘅原因可能係因為負責撰寫嘅記者，係用拼音輸入法，因為「鄭」同「政」喺普通話都係一樣發音，zheng，第四聲。由於係國家機器幫自己「改名」，相信呢位「林政月娥」，都唔敢叫對方更正咯。