會德豐（020）最近登報聘請公關部阿頭，特別嘅係，會德豐一向冇自己嘅公關部門，公關工作主要由同系九龍倉（004）負責。不過，九倉與會德豐老闆吳光正，今年初將會德豐交畀阿仔吳宗權打理，由吳宗權做會德豐主席，太子爺可能想將九倉與會德豐兩個品牌分開做，於是請過一隊公關隊伍喇。
不過要做會德豐公關阿頭都唔易㗎，經驗豐富、同傳媒關係良好、帶到新思維畀公司不在話下，公司仲要求應徵者「能夠分析同明白經濟、政治同埋商業嘅複雜性，睇到當中嘅危機與機遇」。
咁都係㗎，𠵱家香港營商環境咁複雜，吳光正都時不時論政，佢上個月就忽然好好興致，喺九倉股東會後花成粒鐘評論佔領中環同普選等題目。
幫呢類家族企業做公關，絕對需要有好高嘅政治智慧。