狼英話會以個人名義簽名支持反佔中，兩年前退休嘅前教育局局長孫明揚（圖）噚日喺新地案畀完口供後就同八方講，如果佢仲喺政府，一定都會簽名支持反佔中。政壇𠵱家立立亂，喺官場46年嘅孫公話其實只係未到最後一分鐘，所以冇人肯讓步，佢叫大家放心，話政改一定搞得掂。
孫公又話唔覺得中央干預多咗，認為只係大家有心魔，仲話白皮書要法官愛國好合理，外籍法官揀喺香港生活工作，佢哋都要尊重《基本法》。至於狼英嘅表現，孫公勸CY笑多啲，有記者話佢都成日笑㗎，孫公笑笑口反駁：「佢嗰啲……」孫公話退休生活幾寫意，𠵱家忙於鑽研賽馬賠率方程式，成功之後，就可以小賭怡情嘞。