【本報訊】元朗YOHO Midtown前日發生4歲女童墮樓慘劇，肇事單位雖然有窗花，但是女童仍然誤中「死亡陷阱」，疑穿越窗花罅隙直墮平台喪命。女童的家人昨日認屍時激動痛哭。有住戶則投訴屋苑管理處「愛靚唔愛命」，規定住戶需安裝指定款式窗花，但是窗花的罅隙闊度逾5吋，超出專家所指的4吋安全闊度，未能阻止爬窗幼童跌出窗外。
記者：文兆麟 馬家鍵 植敏欣
墮樓4歲姓余女童的父母，昨早與親友一行10多人，到沙田富山殮房認屍。女童的父母傷心激動，需由親友在旁安慰，眾人認屍後未發一言離去。據悉，父母前晚在醫院內疑傷心過度，曾先後暈倒。
闊度超過成人拳頭
居於YOHO Midtown六座高層的曾太，育有14個月大女嬰。她昨向《蘋果》表示，前日毗鄰八座發生4歲女童墮樓事件期間，有部份鄰居目擊過程感到觸目驚心，事後更議論紛紛；屋苑家長更提心吊膽，擔心單位裝有的同款窗花，未能防止下一宗慘劇發生。事緣負責屋苑管理的啟勝管理服務公司，因屋苑外觀問題，規定住戶需安裝指定格仔款式的窗花。
曾太投訴指，「入伙時已經話只可以裝呢款窗花，話唔可以影響美觀喎，又話要遷就窗戶開關嘅手柄位，總之裝咗其他窗花，管理處就話有權上嚟拆咗佢」。曾太批評管理處指定的格仔窗花，罅隙過闊。記者親自量度，發現窗花部份罅隙介乎5.2至5.5吋之間，超過一個成人拳頭，也足夠一名爬窗幼童跌出窗外。
為保小朋友安全，曾太直指「惟有教小朋友唔好爬窗」或「會開少啲窗」。記者昨進入YOHO Midtown內視察各幢大廈，發見除了部份單位裝有同款窗花，不少單位更未有裝上窗花。
其中住戶黃女士稱，因外觀問題，不會考慮裝窗花。雖然她育有7個月大嬰兒，但卻謂「唔擔心，會睇緊啲」。另一名住戶黃先生則表示其家中有裝窗花，但亦擔心窗花罅隙太大，「會特別睇實3歲大嘅孫女」。
屋苑稱不過問尺寸
YOHO Midtown服務處回覆時承認，為顧及屋苑整體外觀盡量一致，該處會建議住戶安裝同一款格仔的窗花，「通常住戶落到嚟（管理處）話裝窗花，我哋會畀式樣佢睇」，但發言人稱：「我哋關心嘅主要係窗花係咪長條橫格嘅格仔，顏色係咪一致，唔想啲窗花又有花又有公仔……至於窗花嘅尺寸同大小，我哋唔會好特別過問，亦冇辦法入屋量度住戶嘅窗花。」服務處強調，對今次不幸事件感悲痛及惋惜，該處一直與家屬聯絡提供適切的協助，並會配合警方協助調查意外成因。
