花旗國上周有幾單新聞，令孫柏文諗起美國未來消費模式會點。頭兩單係兩間公司嘅業績超預期。第一間就係用croslite塑膠做鞋嘅Crocs，盈利跌四成，收入微升吓。盈利大跌嘅原因係公司嚴重偏離做拖鞋本業，但本業唔差，高盛評佢哋為唯一中小型消費類可被收購對象。第二間業績超預期嘅公司，就係做墨西哥快餐嘅Chipotle，佢哋雖然係連鎖式快餐，不過出名用料好出品快，所以就算高速開新店，每間舊店依然有增長。根據Piper Jaffray調查，佢哋係美國後生男性第一品牌，連Starbucks都被砍低。相關新聞仲要話美國後生仔女開始用喺食方面，超過係衣服鞋襪。第三單新聞係一位年輕財經女博客，分享佢第一次唔用二手，買貴價不過覺得最抵用嘅耐用品。買乜？就係一張床褥。
買嘢要快感多過為炫耀
三單新聞睇落完全無關，其實有重要意思。啲人話，特別係男人，喺十幾至廿歲出頭時建成嘅消費模式，一世都懶改（亦解釋點解佢哋冇乜錢，啲公司都傾國傾城咁掟marketing budget落喺呢群人）。
我係香港第一代雙失，十幾至廿歲出頭就撞正建華七年之亂建成嘅消費模式，即係出入T恤短褲Crocs，每月使喺食多過喺衣服鞋襪，鍾意幫襯用料好出品快嘅連鎖式快餐例如添好運、板長（呢兩間上市一定頂頭鎚咁抽兼長揸）。多年前，當有足夠經濟上嘅安全感時，第一件買嘅貴價而我覺得最抵用耐用品，就係一張一呎多厚嘅蓆夢思床褥。香港樓市爆早過花旗國十年，睇我點使錢就知佢哋會點。所以花旗國嚟緊嗰代，會極憎恨負債。買嘢講換到嘅感受、快感，多過要炫耀、搵人認同，因橫掂曾幾何時都試過俾人睇死冇X用，所以冇包袱。而有冇其他啟示？有。除咗上網寬頻要極速絕對唔會慳外，真係有另一耐用品我買咗貴價而又覺得最抵用，仲要香港有上市。係乜？就係新秀麗（1910）旅行篋一隻。
孫柏文
獨立股評人
http://facebook.com/shuen
本欄逢周二刊出