朋友近日跟我說：「我們的世界越來越不尋常、越來越荒謬！」我問：「例如呢？」「例如很多人根本不配擔當其職位，卻照被選中，而且地位一直穩如泰山！」我答：「哦！足球世界都係咁啦，你睇世界盃！美斯4強開始踢到冇影，決賽輸埋畀德國屈居亞軍，大會唔知點解照選佢贏『金球獎』！咪一樣荒謬！」
朋友不忿追問：「咁美斯起碼攞獎都黑口黑面（右）自愧不如；但有啲人開會做主席，啲人未埋位就開始投票，規矩都未識就學人做主席，仲唔面紅喎！」「唓！唔識規矩做主席好奇咩？你睇巴塞主席，當打嘅阿歷斯山齊士都放棄，勁花7,500萬鎊買老兩年兼不時咬人嘅蘇亞雷斯，一樣俾名宿史岱哲哥夫話係『唔識足球嘅人做決定』，唔識足球咪一樣做球隊主席！」
朋友仲嬲：「唔好再拎足球比較，足球起碼仲有『公義』！你睇德國贏世盃，就係10年長期努力嘅成果，起碼證明足球世界中，努力係有回報嘅！再者，無論你捧德國、反德國、撐巴西、踩英軍……賽後都可以喺網上暢所欲言；我哋嘅世界，仲可以暢所欲言咩？」我無言以對。
足球世界確實可愛好多，起碼大家會自發上街去支持同一球隊，而不是「現實世界」有人為收錢而上街反對某些信念；足球世界中，多人支持的球隊就是「主流強隊」，傳媒就有較多篇幅報道；我們的世界，「主流意見」篇幅越來越窄，甚至小眾意見被人扭曲為「主流意見」。長此下去，我哋嘅世界會變成點？可能仲可以「馬照跑、波照睇」，其他？唔知喇……
方柏翹
now足球評述員