又一隻來自福建的半新股出事，銷售男裝的諾奇（1353）上周初股價離奇暴跌，公司一開始聲稱不明股價波動原因，亦未有立即宣佈停牌。直到股價連跌三日、累積跌幅達53%後，有人在微博爆出老闆原來已捲錢挾帶私逃的消息，諾奇才「施施然」停賽，承認老闆已失聯四日，CFO仲跳船，真係畀足時間讓有心人沽貨。諾奇未來可翻身的機會，堪稱微乎其微，恐怕又會成為「半新股爆煲」系列中另一宗無頭公案。
海迪向來唔主張「籍貫歧視」，唔會話來自福建的民企，就一定列佢入高危名單（其實它們都出過一隻藍籌股恒安（1044）。不過近年出事的福建民企確實太多，兩隻手數唔晒，已去到令人難以忽略的地步。
福建人出名團結，唔知係咪因為咁，他們習慣「互相扶持」。以諾奇為例，其同鄉在公司IPO時入飛，比重多到上市後有唔少人竟然要披露權益，如此明目張膽「幫忙」，睇怕公司真係好desperate。
海迪仲聽過其他福建幫的「團結」例子，例如有福建企業，整個董事會兼高級管理層，八、九成都是家族成員或同村村民。有分析員朋友亦曾考察過某間福建服裝公司的訂貨會，裏面正在買貨的分銷商，無論係聲稱來自北京、上海，還是大連、成都都好，竟然開口都係一口福建腔！唔通整條村都過來幫手做「臨演」？真係離奇過天荒夜談。
有福建民企的老闆，其公司已上市多年，早被市場所接納。他曾私下講過，每年都有大量同鄉企業，想找佢賣盤，但當中十居其九點九，都係買唔過。面對質素參差的民企新股，除了勤力啲做功課之外，有時情願先睇多公司幾年表現，切勿輕易落叠。
海迪