券商股喺滬港通同港股創三年新高下，炒到甩轆，5月中主打第一上海（227），翻咗半番。場內嘅英皇證券（717）家陣得6倍PE，近5厘息，加埋半年靚仔業績，望見流口水，股價未點郁過，抵追。
英皇證券除咗主打經紀、配售同包銷業務，兼搞埋私人貸款、企業貸款、基金，同埋投資者入境投資服務。憑住多元發展，半年度（9月年結）純利增長34%到7,100萬元，已經有靚仔純利打底。
估值平絕同業
而喺英皇證券半年結後，港股嚟料，煲到上三年高位，英皇證券下半年張成績單，應該實冇得甩漏。再講，英皇證券喺北京、上海、廣州同深圳，均設立咗四個聯絡辦事處，而滬港通已經如箭在弦，中港雙方兼會一路加大額度，加埋英皇證券牌頭，中線少少，長做長有。
又英皇證券最新PE得7倍咁大把，今年全年純利，只係keep住半年嘅34%增長，到兩億元，EPS 7.9仙，PE跌到得番5.3倍，純券商股計，英皇證券平霸全場。
英皇證券2011年供股，供股價0.338元，大股東包銷，由原先揸得47%，上到60%。呢幾年兼一路增持，到家陣67%，係信心嘅表現。但英皇證券現價（0.425元）仲喺半年底，家陣PB得0.8倍。同樣係純本地薑嘅時富投資（1049，停牌）上月尾開波，到家陣已經升咗38%，PB上到1倍，冇PE。慢打鑼嘅申銀萬國（218），同樣喺上個月尾開波，家陣都翻近半番，PB上到1.8倍，PE兼炒到上47倍，南華金融（619）800倍PE、1.6倍PB。英皇證券比落去，吸引到爆。
買英皇證券追落後，博盈喜，當翻半番計數，見0.63元，PE先得7倍幾，未有耐追到上邊其中一個行家。
錢雋
細價股專家
本欄逢周二、三、五刊出