搞簽名運動搞到創「世界紀錄」嘅「保普選反佔中大聯盟」前晚出新聞稿，除咗宣告反佔中簽名已達93萬，仲點名指控《驅蝗行動》召集人梁金成搗亂反佔中攤位。新聞稿中仲稱梁金成為新同盟立法會議員范國威嘅助理。
梁金成同八方講，大聯盟嘅指控好無稽，首先佢已經退出新同盟，希望各界唔好再搞錯，同時亦話大聯盟指以佢「為首」嘅人搗亂攤位，但查實佢都係知道有咁嘅活動後去參與，而且大聯盟話歡迎各界發聲，佢咪去發聲囉，點解咁樣會被形容為搗亂？佢舉例話，一如青關會都會成日喺法輪功附近出現，雙方其實可以冇衝突㗎，希望外界唔好抹黑佢哋嘅行動喎。