如果唔係之前騰訊（700）同阿里巴巴將戰線伸延到去打的App，大家都唔知家陣內地咁興打的App，難怪騰訊年初早已入股滴滴打車，滴滴打車近期發生高層變動，其中負責營運嘅副總裁張晶唔撈，噚日馬上有傳滴滴打車有強者加盟，就係內地IT教父柳傳志個乖女柳青，話會做滴滴打車首席運營官（COO）一職，呢個消息係騰訊網獨家報道，可信性有啲保證。
講番柳青，來頭絕對唔細，北大畢業後考上哈佛大學研究生院，之後千辛萬苦考入高盛做分析員，最後做到高盛（亞洲）投資部總經理兼執行董事，舊年接受內地《中國企業家》雜誌訪問時提到，佢每年要同團隊一齊飛來飛去睇500幾個項目。唔講唔知，佢今年36歲，已經有3個小朋友。