麥當勞呢場公關災難，恐怕在一姐那隻「Siri式」道歉之後形象更差。但好肯定係而家老麥一定冇福喜貨，如果你唔介意食「走菜包」，呢個時候食啲食材一定相對新鮮，不失為低吸良機。噚日大市又破頂，一係升傳統中資股、一係就升細價殼股。好似隻台和商事（1037），噚日炒高17%後，市值都仲係2.58億，個價堅殘。
作為一隻好殼，你唔賣的話，根本就對唔住「殼」呢個字。台和大股東劉得還，上年9月獲洽售股權，之後好似冇咩風聲，但其實公司今年5月出售工業園資產套現，上周五又公佈削減股份溢價賬，原因係「讓公司日後可更靈活地向股東宣派股息或作出分派」。呢兩個舉動，反映股東做足「金蟬脫殼」準備，隻殼而家有如老麥包咁乾淨，可買包等開餐。
要留意台和第二大股東吳鴻生，旗下南華系密密賣嘢，南華金融（619）直頭話要賣盤。間接話你聽，吳鴻生近期急於套現，佢自然會加把力令促成台和賣盤吧！講真，好似台和咁3億元都冇嘅殼股，真係買少見少，仲要賣殼機會大，炒到市值上5億都不為過，即係股價約1.14元。同樣市值都係3億都冇嘅華建（479），主席柯俊翔官司沒完沒了，最近又俾人入稟追數2,919萬元。故事一樣，股東等錢使，殼股有價有市，而家唔賣，還待何時？
Fifi
http://www.facebook.com/lovefrystock
本欄逢周二、四刊出