一間公司無端端點解會向員工提供一套告密政策呢？「梁粉」陳啟宗旗下恒隆地產（101）喺最新一期內部刊物就用咗一定篇幅講解公司嘅告密政策，講明告密者應該以書面形式透過電郵或郵寄畀公司審計部總監，仲一定要提供真實身份同聯繫方式，方便公司攞到更詳細嘅資料。
恒隆方面解釋，向員工提供告密政策屬於企業管治嘅一部份，想員工更了解公司嘅內部程序。至於調查結果，恒隆話基於私隱理由，調查結果只會向董事總經理，𠵱家就係陳南祿，同埋審計委員會上報，告密者係唔會獲得通知。
不過咁，話到明係告密，當然唔想公開身份，以免他日被秋後算賬，需知一間公司通常多門派，人脈複雜，具名舉報都唔知會有乜嘢後果，擔心影響飯碗應該都係人之常情啩。