超人旗下長實（001）大埔嵐山最近開售，既有實呎177方呎超細單位，又有墳景，話題性極高。長實「樓神」趙國雄繼早前話有墳即係代表風水好，噚日又提起個墳，話呢個地盤過去、現在、將來，絕對唔會干擾人哋個祖墳，希望大家尊重人哋祖先。而為咗表示對先人嘅尊重，對於傳媒再問呢方面嘅問題，佢跟同事都唔會作答㗎喇。
嵐山首批單位剛於周末賣出近九成，樓神噚日好風騷咁話「向山單位賣晒，反映買家對墳景唔太介意」。既然咁好賣，應該唔怕畀人講，咁要講多啲㖭先至係喇，不過佢就無端端主動話，以後都唔講呢個墳景，假如準買家有任何懷疑，佢哋依然會畀對方一個答覆。佢相信，傳媒鋪天蓋地報道，大部份市民都了解嗰個樓盤係有墳墓。