生命有好多嘢屬意料之外，你點會諗過各位巴打經常講嘅「馬賽對波圖」竟然開口中，仲擺喺大家眼前呢？用番經濟角度，馬賽嘅演藝生涯好不幸出現咗黑天鵝，睇嚟以為冇可能發生嘅事真係發生咗。其實黑天鵝通常用嚟形容股市，指不可預測嘅大事件，兼具三重特性，包括唔可以預測，以及擁有強大衝擊力。一旦發生後，市場編造出某種解釋，令佢睇起嚟唔似實際上咁隨機，更易於預測。最經典為美國911事件，環球股市勁跌。
法興研究報告搞咗個黑天鵝指數，推測嚟緊有乜事最有機會成為股市黑天鵝，結果強國樓市成為咗頭號黑天鵝。中國樓市佔全國經濟15%，估有三成機會中國出現樓市爆煲。第二隻黑天鵝，就係歐洲通縮，估佢發生嘅機會都有兩成半，因為近排經濟數據表現麻麻，歐盟改革措施又少。
第三隻有機爆出嘅黑天鵝就係美國債市。儘管市場波動指數仍處低水平，但係美國聯儲局收緊貨幣政策後，國債被拋售，嚿年新興市場走資嘅戲碼又重演，大家都係唔好咁老定。好似前個禮拜，馬航被擊落墜毀，台灣同阿爾及利亞亦發生空難，俗稱恐慌指數的芝加哥期權交易所的波動指數（VIX），曾急升6.2%至12.81，低過歷史平均值20，但都要提醒投資者，下半年未必無風無浪安穩過渡。
C+B
本欄逢周一刊出