香港桌球壇「神奇小子」傅家俊（Marco）愛心爆棚，繼上周喺香港發起一桿過百愛心行動，為香港失明人協會籌款後，噚日就特登飛去北京做善事，一時客串餅乾銷售員，一時拍賣簽名球衣同球桿，而主菜就係化身桌球教練，細心教授每位捐出100元做善事嘅球迷，活動所有收入，將全數捐贈北京自閉症孩童。
新賽季希望打入前5
已為人父親嘅Marco話：「做咗父母之後，親身感受到湊大子女一啲都唔易，尤其屋企有自閉症兒童嘅話，就難上加難，所以希望以自己少少嘅力量幫到佢哋！」其實Marco之前都不時以個人名義行善，今次趁自己對上個幾月冇比賽，希望帶頭做善事，有人提議佢拉埋中國球手丁俊暉一齊做啲crossover嘢，齊齊做善事，佢都話提議唔錯，大家可以拭目以待。
做完善事後，Marco係時候要專注番桌球，北京之行後Marco將會返香港，然後喺本周四出發去英國，準備到拉脫維亞參加8月7號今季第一個歐巡賽，期望今季可打入世界排名頭5嘅Marco話：「今個球季開始咗無耐，希望喺初段嘅比賽攞多啲好成績，對一整季嘅比賽信心會好有幫助。」現世界排第8嘅Marco咁有善心，一定有好報嘅，球迷們繼續支持佢啦！